الاعفاء

في فترة الامتحانات وفي فترة تقديم البروجكتات .. وفي فترة متطلبات الدكاترة اللي ما اخلصون .. دائرة التمية الطلابية شعبة الاعفاء نزلوا اعلان بتجديد البيانات ..
بصراحة .. ما كان عندي وقت أروح أجدد البيانات .. لان محاضراتي .. اخلصون ويا دوامهم .. وثانيا .. الفراغ اللي عندي حده بوصلني الصخير .. والمحاضرة اللي بعدها بدت .. مشكلة .. وثانيا .. المتطلبات اللي حاطينها .. بصراحة .. يبه اليها 5 ايام وانته اجيب واتروح واتودي .. وهذا وهذاك ومني ومناك ..
هذا سببي لأني ما جددت البيانات ..
هلأيام طلعت قائمة المقبولين للاعفاء .. وانا مو موجود وياهم .. حسب ما عرفت من بعض (جزاهم خيرا.. ما قصروا)
اتصلت الى واحد في التسجيل اعرفه .. قال لي الاعفاء عندك.. عادي ما انشال .. وأنا اتأكدت من عندي في التسجيل ..قلت ويش السالفة .. ضعنا .. احنا .. ناس اتقول .. راح الاعفاء وناس اتقول .. موجود عندك ..
قلت .. خلنا انشوف ناس من الاعفاء بدل ما نضربه شوط الى الصخير.. صدفة من شخص الى شخص يعرف واحد مراسل ..في الجامعة .. سألناه اروح اشوف .. قال لي الجواب الأكيد الا وهو .. ان الاعفاء طااااااار..سياسة الجامعة الجديدة .. في تعاملها مع أبنائها الطلبة .. سياسة التقشف . الواحد اللي وصل معدل أعلى المستويات .. اقومون اشيلون الاعفاء عنه... شكلهم بالعكس .. اللي ينزل معدله اخلون الاعفاء اليه .. واللي يرتفع .. اشيلون الاعفاء عنه

تم تمديد .. فترة تحديث البيانات ..لانهم حسوا انهم غلطانين في الوقت اللي نزلوا في الاعلان الاولي ..
بنروح انجدد وانشوف ويش بصير وياهم